WhatsApp ਬਾਰੇ
ਸਾਡੀ ਐਪ
180 ਤੋਂ ਵੀ ਵੱਧ ਦੇਸ਼ਾਂ ਵਿੱਚ ਵੱਸਦੇ ਤਕਰੀਬਨ 3 ਅਰਬ ਤੋਂ ਵੱਧ ਲੋਕ, ਕਿਸੇ ਵੀ ਸਮੇਂ ਅਤੇ ਕਿਸੇ ਵੀ ਥਾਂ ਤੋਂ ਆਪਣੇ ਪਰਿਵਾਰ ਅਤੇ ਦੋਸਤਾਂ ਦੇ ਨਾਲ ਸੰਪਰਕ ਵਿੱਚ ਰਹਿਣ ਲਈ WhatsApp 1 ਦੀ ਵਰਤੋਂ ਕਰਦੇ ਹਨ। WhatsApp 2 ਮੁਫ਼ਤ ਹੈ ਅਤੇ ਇਹ ਮੈਸੇਜਾਂ ਅਤੇ ਕਾਲਾਂ ਦੇ ਲਈ ਇੱਕ ਬਹੁਤ ਹੀ ਸੌਖੀ, ਸੁਰੱਖਿਅਤ ਅਤੇ ਭਰੋਸੇਯੋਗ ਐਪ ਹੈ ਜੋ ਦੁਨੀਆ ਭਰ ਦੇ ਫ਼ੋਨਾਂ ਲਈ ਉਪਲਬਧ ਹੈ।
1 ਅਤੇ ਹਾਂ, WhatsApp ਨਾਂ ਵਾਟਸ ਅਪ ਵਾਕਾਂਸ਼ ਦਾ ਇੱਕ ਮਖੌਲੀਆ ਰੂਪ ਹੈ।
2 ਡਾਟੇ ਦਾ ਖਰਚਾ ਲਾਗੂ ਹੋ ਸਕਦਾ ਹੈ।
ਸਾਡਾ ਮਿਸ਼ਨ
WhatsApp, SMS ਦੇ ਇੱਕ ਵਿਕਲਪ ਵਜੋਂ ਸ਼ੁਰੂ ਹੋਇਆ ਸੀ। ਸਾਡਾ ਉਤਪਾਦ ਹੁਣ ਵੱਖ-ਵੱਖ ਤਰ੍ਹਾਂ ਦੇ ਮੀਡੀਆ ਨੂੰ ਭੇਜਣ ਅਤੇ ਪ੍ਰਾਪਤ ਕਰਨ ਦਾ ਸਮਰਥਨ ਕਰਦਾ ਹੈ: ਲਿਖਤ, ਫ਼ੋਟੋਆਂ, ਵੀਡੀਓ, ਦਸਤਾਵੇਜ਼ ਅਤੇ ਟਿਕਾਣਾ ਅਤੇ ਇਸਦੇ ਨਾਲ ਹੀ ਵੌਇਸ ਕਾਲਾਂ। WhatsApp ਰਾਹੀਂ ਤੁਸੀਂ ਆਪਣੀ ਜ਼ਿੰਦਗੀ ਦੇ ਕੁਝ ਬਹੁਤ ਹੀ ਨਿੱਜੀ ਪਲਾਂ ਨੂੰ ਸਾਂਝਾ ਕਰਦੇ ਹੋ, ਇਸ ਲਈ ਅਸੀਂ ਆਪਣੀ ਐਪ ਦੇ ਵਿੱਚ ਸਿਰੇ-ਤੋਂ-ਸਿਰੇ ਤੱਕ ਇੰਕ੍ਰਿਪਸ਼ਨ ਸ਼ਾਮਲ ਕੀਤੀ ਹੈ। ਹਰ ਉਤਪਾਦ ਦੇ ਫੈਸਲੇ ਦੇ ਪਿੱਛੇ ਸਾਡੀ ਇੱਛਾ ਹੈ ਕਿ ਅਸੀਂ ਲੋਕਾਂ ਨੂੰ ਸੰਸਾਰ ਦੇ ਕਿਸੇ ਵੀ ਹਿੱਸੇ ਵਿੱਚ ਬਿਨਾਂ ਕਿਸੇ ਰੁਕਾਵਟਾਂ ਦੇ ਸੰਚਾਰ ਕਰਨ ਦੇਈਏ।
ਸਾਡੀ ਟੀਮ
WhatsApp ਦੀ ਸਥਾਪਨਾ ਜਾਨ ਕੂਮ ਅਤੇ ਬ੍ਰਾਇਨ ਐਕਟਨ ਦੁਆਰਾ ਕੀਤੀ ਗਈ ਸੀ ਜਿਨ੍ਹਾਂ ਨੇ ਪਹਿਲਾਂ Yahoo 'ਤੇ ਇਕੱਠੇ 20 ਸਾਲ ਕੰਮ ਕੀਤਾ ਸੀ। WhatsApp 2014 ਵਿੱਚ Facebook ਦਾ ਹਿੱਸਾ ਬਣਿਆ, ਪਰ ਇੱਕ ਮੈਸੇਜਿੰਗ ਸੇਵਾ ਬਣਾਉਣ 'ਤੇ ਇੱਕਮਾਤਰ ਫੋਕਸ ਨਾਲ ਇੱਕ ਵੱਖਰੀ ਐਪ ਦੇ ਰੂਪ ਵਿੱਚ ਕੰਮ ਕਰਨਾ ਜਾਰੀ ਰੱਖਦਾ ਹੈ ਜੋ ਦੁਨੀਆ ਵਿੱਚ ਕਿਤੇ ਵੀ ਤੇਜ਼ੀ ਨਾਲ ਅਤੇ ਭਰੋਸੇਯੋਗ ਤਰੀਕੇ ਨਾਲ ਕੰਮ ਕਰਦੀ ਹੈ।